مشاهدة : 80490
صفحة 1 من 92 1231121 ... الأخيرةالأخيرة
النتائج 1 إلى 3 من 276

الغارقات في دوامة الحب...

الغارقات في دوامة الحب... السلام عليكم كيفكم طبعا ماراح اطول عليكم . ج الاول زء ... اجمل الروايات احلا روايات طويلة افضل رواية قصيرة

مقالات مشابهه موضوع على صله

  1. روايتي الاولى مراهقات داخل دوامة الحياة
    بواسطة مترفة المشاعر في المنتدى اجمل روايات احلى رواية جديدة Novels Narratives
  2. [3]::عمل دوامة متحركة::
    بواسطة waddah في المنتدى ابداعات تصاميم الأعضاء
  3. الانسان قبل الحب شىء وعند الحب شىء وبعد الحب لاشىء
    بواسطة بارقة نور في المنتدى خواطر كلمات رومانسية كلام رومانسي عبارات ادبية
  4. آهات قلبي الصامته في دوامة البحر
    بواسطة Sad-heart في المنتدى الشعر قصائد عربية قصايد شعراء قصيدة شاعر
  1. #1
    r-k-a-y غير متصل صعب اننا نوصفه
    تاريخ التسجيل
    Aug 2007
    الدولة
    عالمي الوردي
    المشاركات
    3,449


    السلام عليكم كيفكم طبعا ماراح اطول عليكم .

    ج الاول زء ..

    في وقت كان قبل منتصف الليل بساعة . رياح نهاية الربيع هبت وهزت معها الاشجار الخضرا والازهار الملونة اللي كانت مجملة الحي اللي كان من اجمل احياء الرياض وارقاها .
    في وحدة من البيوت اللي كانت في الظاهر تشبه القصور وفي وحدة من غرف الدور الثاني ..
    ،،،،،،،

    مدت يدها لدرج التسريحة . وطلعت جميع المكياجات اللي فيه بدت تلون وجهها على حسب ذوقها وتفننها . كانت لها لمسات حلوة لانها كانت متابعة لمجلات الفاشن والموضة واساليب التجميل . ظلت نص ساعة تلون وجهها وتمسح وتعيد المكياج باشكال ثانية . ماكان عندها مناسبة او شي بس لانها كانت تحس بالفراغ .. !
    وبطبيعتها الانثوية كانت تدور وتبحث عن اشياء تبرز انوثتها وجمالها الناعم وبنفس الوقت تمرن يدها على وضع الميك اب ...

    اول شخصية تبرز بهالقصة هي .. ندى


    ** ندى هي البنت الثانية في عائلة ابو فهد وعمرها 19 سنة ... هالعائلة مكونة من 8 افراد ابوها وامها ولها اختين بتتعرفون عليهم من خلال الاحداث القادمة و3 اخوة راح تتعرفون عليهم ايضا . هالبنت ذات شخصية رومانسية بطبيعتها وحالمة ولا تخلو طبعا من المشاغبة والمشاكسة *


    انا عن نفسي احببت هذه الشخصية جدا من خلال كتابتي للقصة ودخلت مزاجي مرة

    في اثناء اندماجها في خلط الالوان ورسم الشدو كانت مشغلة المسجل على اغنية
    " كل القصايد " وتغني بنعومة صوتها معه ..
    رن جوالها اللي كان موضوع قدامها عالتسريحة . تركت اللي بيدها وقصرت على صوت المسجل . رفعته . شافت الاسم وردت .
    ندى هلا نوف .
    نوف هلا والله كيفك
    ندى تمام . انت شخبارك
    نوف كويسة .
    تنهدت ندى بضيق ورفعت الريشة تكمل الشدو .
    نوف شفيك
    ندى ........... زهقانة .
    نوف ليش عسى ماشر .
    ندى ابد . بس احس اني مخنووقة .
    نوف هههههههه .. اذكري الله .
    ندى بتملل لا اله الا الله ليش تضحكين
    نوف اضحك عليك . دايما على هالحال خلاص حبيبتي بكرة تبدا الدراسة ومعدك لاقية وقف تفضين فيه .
    ندى . ااااخ . وهذا اللي مزهقني زيادة بكرة جامعة !
    نوف اما انا متحمسة . بكرة بروح الجامعة .. والله ماصدق

    ** نوف . بنت خالة ندى . واصغر منها بسنة يعني 18سنة . بما انها اقرب وحدة لندى بالسن فهم متفاهمتين وعلاقتهم متينة . نوف بنت منطقية جدا وعلى درجة من الذكاء وماتحب حركات الحب وهالخرابيط اللي تكون في هالسن سن المراهقة ومابعد المراهقة لانها مؤمنة بان المجتمع اللي تعيش فيه مايساعد على هالاشياء انا ماقول بانها تخلو من الرومانسية ولا اقول بانها بنت جامدة من غير مشاعر . لا فهي بنت حبوبة جدا . وذات جمال هاااادئ . لكنها مقرة بان الحب اللي تمتلكه لا يمكن ان يظهر قبل الزواج .. افراد عائلتها اخذت حيز كبير من القصة . ومارح اعرفكم عليهم الحين . بيدخلون في الاحداث بشكل تدريجي وان شالله ان كل شخصية تلقى تقبل منكم **
    ^^^ نرجع للحوار ^^^

    ندى لا تذكريني الله يعافيك ترا واااااصلة حدي .
    نوف والله انك غريبة . مالة من الاجازة وماتبين الجامعة . وش تبين بالله !!
    ندى مدري يانوف مدري !!...احس روحي ضايقة وودها تطلع مدري شفيني .
    نوف حرام عليك ثلاث شهور فاضية بس اكل وشرب ونوم وش تبين اكثر !
    ندى بس هالعطلة لا سفرة ولا كشتات في البر . زهقت من كثر ماروح للسوق. حتى ملابس الجامعة شاريتها في اول اسبوع من الاجازة ..!!!!. مالقيت شي يشغلني غير التلفزيون والافلام والنت وكل هذا مليت منه .
    نوف ويعني
    ندى ابي احد يملى علي حياتي واتكلم معه بالبيت . امي دايما مع ابوي . ونجلاء مثل ما انتي عارفة تزوجت وراحت . وفهد طول الوقت طالع .. ونايف بزر ولسانه طويل . ومنى صغيرة ماقدر اتكلم معها باللي ابغى .
    نوف افاا . وانا مامليت عينك والا انا مانيش قد المقام يعني .
    ندى وانا مااقدر اتكلم معك باي وقت . تعرفين خالتي مشغولة باللي يجون يباركون لكم ببيتكم الجديد . وانت وسهى مشغولات معها في هالفترة كلها . ولا عندي بنات اعمام اروح لهم ويجوني حالة محبطة صدق

    ** ندى مالها اعمام . عشان كذا مالها بنات عم . وجدها وجدتها توفوا قبل كم سنة *

    نوف وصديقاتك وين راحوا
    ندى صديقاتي كلهم مسافرين مع اهاليهم .. اللي رايحة لاوروبا . واللي رايحة لجنوب افريقيا واللي رايحة ...... تنهدت يابختهم والله .!!
    نوف تكلم امها اللي تناديها نعم يمه جاية جاية .. اقول ندى . امي تناديني . باي
    ندى شفتي شلون انشغلتي . باي

    سكرت الخط .. رجعت الريشة على التسريحة وهي حتى مب طايقة نفسها . لمتى بقعد على هالحال ..
    قامت وهي حتى ماكملت الشدو توجهت للبلكونة وفتحت بابها طير شعرها نسيم الربيع غمضت عيونها وهي تتقدم بخطوات هادية وتحس برقة النسيم يتخللها .
    كانت بلكونتها فسيحة وكانت حاطة فيها جلسة صغيرة حلوة مشت لدربزين البلكونة وتسندت عليه بيديها ووجهت نظرها للقمر اللي كان مضوي السما بنوره الاخاذ كانت ليلة قمرة والنجوم مزينتها اكثر ظلت عيونها العسلية على البدر واطلقت زفرة من اعماق قلبها لها الف معنى ومعنى غمضت عيونها مرة ثانية لما حست بنسايم الهوا البارد يرجع يثور ويطير خصل من شعرها يمين وشمال .
    هدا النسيم بعد لحظات ورفعت يدها تشيل الخصل اللي طاحت على عيونها وسحبتها ورا اذنها رفعت يدها تشوف الساعة لقتها11.30....
    حست بالجو بدا يبرد فدخلت وسكرت الباب وراها . تهادت على سريرها تتنهد ماتدري وشلون تملي فراغها اللي هي حاسة فيه ..

    طاحت عينها على كيسة على الطاولة . تذكرت انها مجموعة افلام شرتها امس .. خذت لها واحد وشغلته . وجلست تتابع . مع انه ماكان لها نفس انها تتابع اي شي بس شغلته لعل وعسى يفرفشها شوي .

    ................................................. ....

    يوم السبت .. اول يوم من ايام الدراسة .. كانت الشمس قد اشرقت ومدت اشعتها الذهبية على مد النظر . تملي السما بدفاها من بعد نسيم الليل البارد .
    الساعة 7 الصباح .. ام فهد رقت الدرج رايحة لغرفة ندى بنتها تصحيها للجامعة ...

    ** ام فهد " الجوهرة" . 45 سنة . ام ذات قلب كبير جدا حنانها يغمر بيتها كله . وهي خيرعون ومعين لزوجها ابو فهد تزوجت منه من 25 او 26 سنة ومازال الحب عايش بين هالزوجين . شخصية لها دور كبير في القصة مارح اتكلم عنها اكثر انتوا اكتشفوها . **


    ام فهد فتحت الباب والنور ندى قومي يا بنيتي ما عاد الا الخير قومي لا تتاخرين ..
    ندى وهي تنقلب عالجهة الثانية يوووووه يمه خليني ما نمت الا متاخر ....
    ام فهد محد قالك تسهرين . قومي يالله ..
    راحت ام فهد للمكيف وسكرته...
    ندى يوووه ...... يمه الله يخليك تكفين خليني انام . اوووف
    ام فهد عصبت وسحبت اللحاف من بنتها ما في نوم بس خلاص . ترا فهد مب فاضيلك
    وراه جامعة بعد ...
    ندى يوم شافت ان ما في امل ترجع تنوم . امها اذا اصرت انها تقوم خلاص رح تقعد فوق راسها لما تقوم خلاص يمه هذاني قمت ...
    ام فهد يالله يايمه استعجلي ..على بال ماتلبسين وتفطرين وتتجهزين الا الساعة سبع ونص
    والجامعة على بال ما توصلينها يبيلك على الاقل ثلث ساعة مع زحمة الشوارع ..
    ندى ان شالله يمه ..
    ام فهد وانا بروح اقوم فهد الحين .
    سكرت ندى الباب عشان تلبس وكان ودها انها تبكي تبي ترجع تحت بطانيتها مكان ماالدفا موجود .
    وام فهد راحت لغرفة ولدها .

    على الساعة سبع ونص نزلت ندى جلست على طاولة الاكل مع امها .
    ندى اجل يمه وين ابوي .
    ام فهد ابوك وصل منى ونايف للمدرسة وراح لشغله .
    ندى ليش وش عنده رايح بدري اليوم !
    ام فهد والله يابنيتي مدري . كل اللي قاله لي ان عنده شغله ضرورية يبي يخلصها عشان يقدر يرجع عالغدا..
    في هاللحظة نزل فهد متكشخ وجلس معاهم عالطاولة وخذاله كوب نسكافيه ..
    ام فهد ورا ما تاكل يا فهد . ما يسدك هذا
    فهد لا يمه مااشتهي ..
    ام فهد مايصير عاد لازم تاكل
    فهد والله مااشتهي يمه . ان جعت باكل من كافتيريا الجامعة ...

    ** فهد 22 سنة . في سنة ثالث بجامعة الملك سعود اللي يشوف عمره يقول اخر سنة لكنه في دراسته متاخر لانه اعاد سنة بالثانوية ... فهد هذا شخصية مختلفة جدا جدا ما يشبه لاي احد حوله . سواء في كلامه في تصرفاته او اي شي يخصه هو منفرد فيه ومايشابه اي احد . لدرجة اني انا نفسي اعجبت فيه . كما ان فهد يمتلك سحر خاص مقرون بجاذبية قلما يمتلكه غيره . بكتفي بكلمة " مختلفة " وانتوا اللي بتعرفون وش معنى كلامي من خلال الاحداث مثل ماقلت لكم فهد له دور كبير في احداث قصتي .. وله نصيب
    من عنوانها . *

    اذن .... فهد . احد الشخصيات الاساسية والبارزة. واحد العناصر المهمة اللي تقوم عليها القصة ..

    فهد خلص كوبه والتفت لندى ..
    فهد ندى يالله قومي ..
    ندى لحظة تو الناس خلني اكمل فطوري .
    فهد لا تكملينه قومي يالله .
    ام فهد خلها ياحبيبي تاكل . تو الناس .
    فهد وش تو الناس يمه ان ما تاخرت هي انا بتاخر والشباب ينتظروني . ندى يالله
    ندى خلاص طيب لا تعصب .
    رجعت كوب النسكافيه عالطاولة بعصبية وقامت .
    طلع فهد وركب سيارته ندى لبست عبايتها ولحقته . وهي تتحلطم ..
    يعني لا نومي تهنيت فيه ولا حتى الفطور ..

    في السيارة .
    بعد صمت دام لمدة 10 دقايق ...
    ندى اقول فهد ...
    فهد هممم.....
    ندى متى راح تطلع اليوم من الجامعة ...
    فهد مادري على حسب .. يمكن اقعد مع اخوياي . يمكن اطلع مبكر مدري
    ندى اييه ..لانك تدري ان اليوم اول يوم ..بس اخذ الجداول ما في محاضرات ولا شي...
    فهد يعني ماراح تقعدين في الجامعة مع صديقاتك مثل العادة..؟!!
    ندى تصدق عاد ودي...بس انا مانمت امس الا ثلاث الفجر . وابي ارجع انووووم .
    فهد كم يبيلك يعني .؟
    ندى يعني قول ساعتين على بال ما اسلم على البنات واخذ الجدول واجلس معاهم شوي
    فهد خلاص اجل لما تخلصين دقي علي .
    في هاللحظة شهقت ندى شهقة خلت فهد يرتاع صدق...
    فهد وهو معصب عمى ان شالله خير وش فيك .؟
    ندى وهي حاطة يدها على فمها نسيت . جوالي ..
    فهد عقب ما استرخى شوي مالت عليك انت وهالجوال . ماله داعي هالشهقة عاد حشى كنك بتموتين ..
    ندى بدلع لييييش .. خايف علي .؟!!
    سكت ومارد عليها . وناظرها بنص عين ..
    ندى والحين وشلون . وشلون ادق عليك ..
    فهد مدري دبري عمرك ...
    ندى بمزح طيب عطني جوالك ..
    فهد تحلمين ...
    ندى يوووه . ايه صدق . نوف اكيد معها جوال ...
    وفي هاللحظة شهقت شهقة ثانية اقوى من الاولى . فهد من روعته مسك الملف اللي جنبه وخبط به راس اخته .
    ندى اااااااااي ....راسي راسي .
    فهد كم مرة قلت لك خلي هالخبال عنك وهالخرشة ...
    ندى ياربي ياويلي . ياويلي ..نوف بتذبحني .
    فهد مستغرب ليش . وش مسوية لها بعد ...؟!!!!!!
    ندى تلقاها الحين في الجامعة تنتظرني . ياويلي بنذبح اليوم .
    فهد مستغرب اكثر ..واذا....؟؟
    ندى هي الحين اول سنة لها وما تعرف الجامعة ولا شي .. عاد جامعة الملك سعود
    مدينة بكبرها ماشالله . تلقاها الحين قاعدة ضايعة في الطوشة هي موصيتني ما اتاخر
    فهد هي تخرجت من الثانوية ماشالله ؟
    ندى صدق انك ماتدري عن الدنيا ..
    فهد اي قسم .؟
    ندى انجليزي .
    فهد وش معنى؟؟
    ندى .كذا . تحب الانجليزي . ومقررة تدخل هالقسم من يومها في المتوسط ...
    فهد بلا مبالاه اهاا ..... المهم وصلنا يالله ظفي وجهك ..
    ندى فتحت عيونها والتفتت لاخوها بعصبية شف ! ... هيه خير ان شالله .؟
    فهد خلصينا انزلي يا بنت الحلال ..وراي جامعة انا بعد ..
    نزلت معصبة . وسكرت الباب بقوة عشان تقهره وتحرق دمه . تعرفه اخوها كلش ولا سيارته
    فهد فتح دريشة السيارة وقال ينادي على اخته اللي التفتت عنه ماشية ولا كانها سوت شي نديو ..كم مرة قلت لك شوي شوي على باب السيارة . تفهمين الكلام ولا لا؟
    ندى احسن . تستاهل وكملت مشيها
    فهد هيين ياندى . دوري لك واحد ثاني يجيبك من الجامعة . انطقي فيها لين الساعة وحدة .
    وقفت مكانها مصدومة . تعرفه اخوها سواها فيها كذا مرة مو بعيدة يسويها بعد اليوم . ورجعت للسيارة تمشي بسرعة كانها تركض لا يروح عنها ...
    ندى تترجى لا فهد الله يخليك والله ماعيدها مرة ثانية ..
    فهد .........
    ندى الله يخليك يافهد ..اسفة اسفة ...ابوس راسك ..
    فهد تعالي بوسيه يالله ..
    ندى بصوت مذلول لا عاد موهنا ..في البيت ..
    قعد يناظرهابطرف عينها .. مستانس بذلتها ....
    ندى شوي وبتصيح فههههههههههد .. لا تصير ماصخ عااد !!
    مر شبح ابتسامة على شفايف فهد اللي كان لابس النظارات الشمسية ..
    فهد خلاص روحي لا تقعدين واقفتلي هنا ..
    ندى يعني بتجيني ؟
    فهد خلاص بجيك يالعلة ...
    بغت ترد لكنها سكتت وزمت شفايفها لا تطلع منها اي كلمه غلط ...تخاف يهون مرة ثانية ...

    ندى ماتعرف ترد على فهد بالاوقات اللي تكون فيها محتاجة له . لان فهد بطبيعته عزيز نفس ومايحب اي احد يتكابر عليه بالالفاظ ..
    تم يناظرها وهو مبتسم عرف انها بغت ترد عليه بس ماتقدر..... فما قدر الا انه يضحك بصوت عالي ..
    ندى اللي تنرفزت لفت ومشت للبوابة عشان مايطلع منها كلام غصب عنها . وبعدين هي اللي تتوهق ...
    من جهة ثانية ... في وسط زحمة البنات . والفوضى اللي كانت حاصلة بنت تسلم على هذي . وبنت تنادي على هذيك . وصوت كلام وضحكات عااالية ضاجة بالمكان

    نوف كانت تنتظر عند بوابة الجامعة . متنرفزة حدها .
    ياربي هالندى قايلتلها وموصيتها تجي مبكرة ...عارفتني مستجدة . وماعرف شي اوووف هين خلها تجي ..
    وفي هاللحظة شافتها جايه وتاشر لها بيدها ....
    ندى اهلييييييييييين نوف .. هلا بالجامعية .... ووقفت تطالعها من فوق لتحت . الله الله ايه دي الشياكة ؟!!...... سلمت عليها
    نوف معصبة تستهبلين !!......
    ندى لا والله ما استهبل... الا تهبلين ماشالله وش هالذوق .تنورة سودا ..وبلوزة
    تركواز.. والله طالع عليك جنااااااان ..
    نوف بحيا تسلمين ياعمري عيونك الحلوة ..
    ندى الا انت من متى جايه .
    نوف تذكرت وعصبت الا صدق انت يالدبا.. ليش تاخرتي . قاعدة انتظر لي نص ساعة
    ندى والله اسفة .. نمت متاخر وقمت متاخر ...
    نوف: محد قالك لا تنومين بالليل ياللئيمة . انت عارفة ان وراك جامعة ووراك نوف بنت سعد تصالينها ...
    ندى والله اسفة ياعمري . كنت سهرانه على فلم انما ايه !...شي....
    نوف خلاص يكفي افلام.. ما مليتي ...كل اجازتك افلام ..
    ندى وش اسوي يابنت الحلال انت تعرفين ان هالصيف ما سافرنا وانا اجازتي كلها ياسوق ياقاعدة بالبيت ........... ولا عندي لا خوات قدي ولا بنات عم اسولف معهم .. ماعندي الا انت . حبيبتي نوف ..... المهم انا اسفة وحقك علي..
    نوف لا خلاص ماله داعي . المفروض انا اعتمد على نفسي ..
    ندى افاا عليك يانوف . انا بنت خالتك ماتبني اساعدك يعني .!!
    نوف لا والله ياندى مو قصدي ..بس انت تعرفين ان محاظراتنا ماراح تكون مع بعض ..عشان كذا مصيري اقعد لحالي واعتمد على نفسي...
    ندى وليش تقعدين لحالك . شوي شوي وبتلقين بنات تقعدين معهم . ومب اي بنات
    بنات ذووق . واخلاق بعد. ..
    ابتسمت نوف لندى ..
    ندى يالله نشوف جداولنا .
    نوف يالله ...
    ومسكوا يدين بعض وراحوا ......


    بعد ساعة .... راحوا للكافتيريا . يجلسون يرتاحون وياكلون لهم شي ويتناقشون في جداولهم ...
    لقوا لهم طاوله فاضيه راحوا لها بسرعة وجلسوا ....
    ندى يالله . اشين يوم يوم الثلاثاء كله محاظرات ورا بعض ولا في الا ساعة وحدة بس فاضية ...وش ذا الزهق .!!!
    نوف هههه ..مب انت لحالك اللي محتشره .شوفي هالبنات كل وحدة ماده بوزها شبرين ومعها جدولها ..
    التفتت ندى وشافت البنات ..
    ندى هههههه . شوفي اشكالهم وشلون!!!
    نوف لا تضحكين عليهم .حتى انت شكلك تو زييهم .!!!...هههههه
    ندى انطمي ياحمارة ..(ومسكت ورقتها وضربتها على راسها ...
    نوف هههههه....امزح ..... ههههه
    ندى تمزحيييين .؟!!!.... واضح .... قومي يالله اشتريلي شي اكله..
    نوف ليه . ماافطرت بالبيت !! .....
    ندى برطمت وبدلع لا ... ما افطرت زيييين ....
    نوف وش اللي منعك ما تفطرين زي الناس والعالم...؟!!!!!
    ندى مازالت مبرطمه ......... فهييييييييييييد .....
    سكتت نوف فترة بعدين ظحكت بصوت عالي ....
    ندى عصبت ليش تضحكين !...مافي شي يضحك ..
    نوف: هههههههه .... اخوك هذا ماتخلص سوالفك وياه .... هههههه.... ماعمرك جيتيني ولا شفتك الا اشتكيتي منه ....هههههه..
    ندى شوي وبتصارخ هييييييه ....بس خلاص ضحك .... مافي داعي تضحكين كذا ..فضحتينا ...
    نوف هههههه ...
    سكتت ندى معصبة ....يوم شافتها نوف غصبت نفسها وسكتت .. وقامت عشان تجيب الفطور للست ندى ...
    نوف خلاص ندى لا تزعلين .. قولي وش تبين من الكافتيريا ..
    ندى مابي شي هونت ...
    نوف لا والله بجيبلك .. وش تبين !!
    ندى ...............
    نوف يوووه عاد ندى قولي وش تبين !
    مبرطمة .............
    نوف خلاص بجيبلك على ذوقي ...
    وراحت للكافتيريا اللي كان شوي مزحوم ...
    بعد ربع ساعة رجعت نوف للطاولة اللي كانت عليها ندى وملتفته لجهه ثانية وباين ان عقلها ساارح في مكان ثاني ...
    نوف اوووووف ..وش هالزحمة يالله .....حشا كنهم ما قد شافوا خير.....
    انتبهت لها ندى والتفتت عليها .. وعقب غرقت في نوبة ضحك ...
    نوف استغربت خير وش اللي يضحك لها الدرجة .؟!
    ما قدرت تتكلم وكملت ضحك وهي تاشر على وجهها ....
    نوف شكت بالموضوع وطلعت المراية اللي كانت بجيبها وشافت نفسها بعدين شهقت ...
    نوف يا ويلي .. وش هالكشة ...
    بسرعة طلعت المشط اللي كان بشنطتها ومشطت شعرها ورتبته ..
    وقعدت اووف كل هذا بسبت هالزحمة......هيي انتي بسك خلاص من الضحك لاقوم الحين واحوس شعرك ....
    ندى لالالالا خلاص بسكت .... ههههه ..... ماقدر .... هههههه . شكلك كان خلفه !
    نوف نديو ..اعقلي بس خلاص .. ترا عطيتك وجه .... ونبهتي الناس علي .!!
    ندى طيب خلاص بسكت .......... وش جبتي لي..؟
    نوف sandwich club . وبيبسي ..
    ندى الله .. ساندويتشي المفضل .. وانتي !!
    نوف انا جبتلي كابتشينو ..
    ندى بس !!!!
    نوف ايه بس ... انا مفطرة في البيت ..مب زيك ...
    ندى يوووووه نوف لا تذكريني .. منرفزني فهييد اليوم وذالني ذلة .. الله لا يوريك
    ابتسمت نوف اللي كانت فيها الضحكة عشان ما تعصب ندى ليش وش مسوي بعد؟!!
    ندى كشرت لا خلاني افطر اليوم زي الناس .. ومخليني انذل واترجاه في الشارع قدام الله وخلقه عشان يجيبني من الجامعة ....
    ضحكت نوف ..لكنها ضحكه خفيفة ..
    ندى اييييه وش عليك ... اضحكي ما عندك اخو مثل فهد يذلك ويلعوزك ...
    نوف انتي اكيد مناقرته .. والا ما يذل هو بدون سبب ..
    ندى برطمت وسكتت ....
    نوف ساكته !! ... اكيد مسوية شي....
    ندى ........... سكرت باب سيارته بقوة ...
    بعد كذا نوف ما قدرت تكتم ضحكتها . ههههههههههههههههه هههه .... باب سيارته مرة وحدة !..ههههههه
    ماتعرفين اخوك يعني ياندى ...هذي سيارته ..اغلى شي على قلبه ...
    ندى اييييييه ادري هو قهرني ياختي ... عقب ما وصلني قام يسب ويطردني من سيارته ..حشا كاني مب اخته ....
    نوف زاد ظحكها ...... تعرفه ولد خالتها .. شخصيته واطباعه ماتغيرت من وهو صغير ..
    ندى سكتت وكملت فطورها ...وشوي شوي . سكتت نوف بعد وكملوا سوالفهم ...
    بعد نص ساعة ...
    ندى نوف متى بتروحين للبيت ..
    نوف والله مدري انت بتروحين متى .؟
    ندى انا قايلة لفهد يجيني بعد ساعتين والحين الساعة رفعت ايدها تشوف الساعة عشر الا ربع بس هو قايلي اتصل عليه .. معك جوالك !
    نوف ايه ..ليش جوالك ما جبتيه
    ندى لا والله نسيته من العجلة . ممكن شوي جوالك
    نوف اييه اكيد .. تفضلي . وعطتها الجوال ..
    دقت ندى على رقم اخوها فهد .....

    اذا شفت ردود كملتها...




    hgyhvrhj td ],hlm hgpf>>>

    من مواضيع r-k-a-y :


  2. #2
    r-k-a-y غير متصل صعب اننا نوصفه
    تاريخ التسجيل
    Aug 2007
    الدولة
    عالمي الوردي
    المشاركات
    3,449
    وين الردود 11 وحد\ه دخل ولا رد..

  3. #3
    السيده ليمونه غير متصل طالب متوسط
    تاريخ التسجيل
    Jun 2007
    المشاركات
    187
    واااااي تحمست وين التكمله ما اطيق اصبر كثير

صفحة 1 من 92 1231121 ... الأخيرةالأخيرة
جميع ماينشر يمثل الكاتب ولايمثل الموقع والادارة والمشرفين
الدورات التدريبية جامعة نجران